quaerunt Penates, forte Loyolae audiunt
affixa falso scelera; ne quidquam grave
sustineat insons, conciti affatum petunt.
PRAE. -Portenta crescunt ; advoca, admitti placet.
Diem lapillo candido hunc coelum notat.
Salvete proceres, teneo suscepti probe
causam laboris, ante sed vertit Deus:
Loyola foedum salvus evasit dolum.
Roma innocentem agnoscit. GAL.-Insontem probat
clamatque dudum Gallia. VEN. -Venetiae pium.
HISP. -Hesperia sanctum, clamat, agnoscit, colit.
praestant alii. Sonant interiam tubae
ac tympana. Princeps Octavius
qui spectabat a superiori loco
ingreditur et cum caeteris salutat
PRAE. -Colamus omnes. Innocens vivat pater,
Loyola vivat orbis, atque Urbis pater.
OMN. -Loyola vivat orbis atque Urbis pater.
PRAE. -At te nefande fraudis iniustae sator
quae digna merces vindicet? Eculei truces,
durae catastae, fusilis ferri liquor,
cruenta forceps, ignium lentae faces,
et quidquid unquam barbari norunt Scythae
leve est, nefarie proditor, nimium leve.
Vix Stygia crimen unda tam dirum eluat.
Quot scelera in uno scelere patrasti, scelus!
Periura coelum lingua, fraus Romam, dolus
summum tribunal gentium, fallax fides.
Amica laesit iura, fecundum nefas,
