Page:APUG 1123.pdf/86

From GATE
This page has not been proofread


quaerunt Penates, forte Loyolae audiunt
affixa falso scelera; ne quidquam grave
sustineat insons, conciti affatum petunt.
PRAE. -Portenta crescunt ; advoca, admitti placet.
Diem lapillo candido hunc caelum notat.
Salvete proceres, teneo suscepti probe
causam laboris, ante sed vertit Deus:
Loyola foedum salvus evasit dolum.
Roma innocentem agnoscit. GAL.-Insontem probat
clamatque dudum Gallia. VEN. -Venetiae pium.
HISP. -Hesperia sanctum, clamat, agnoscit, colit.

Praetor veneratur Stum Ignatium,

id iam praestant alii. Sonant
interim tubae ac tympana.
Princeps Octavius qui spectabat
a superiori loco ingreditur

et cum caeteris salutat.

PRAE. -Colamus omnes. Innocens vivat pater,
Loyola vivat orbis, atque Urbis pater.
OMN. -Loyola vivat orbis atque Urbis pater.
PRAE. -At te nefande fraudis iniustae sator
quae digna merces vindicet? Eculei truces,
durae catastae, fusilis ferri liquor,
cruenta forceps, ignium lentae faces,
et quidquid unquam barbari norunt Scythae
leve est, nefarie proditor, nimium leve.
Vix Stygia crimen unda tam dirum eluat.
Quot scelera in uno scelere patrasti, scelus!
Periura caelum lingua, fraus Romam, dolus
summum tribunal gentium, fallax fides.
Amica laesit iura, fecundum nefas,