Page:AKC 1659 08 28 561-281.pdf/2

XI. Liber est de Chronographia, seu Ratione temporis Astromomici, Politici, et Ecclesiastici distinguendi, ordinandi, ac supputandi; nec non de Computu Ecclesiastico etc. XII. Liber [est] de Geographia agitq[ue] de Terraquei globi divisione, descriptione, dimensione, repraesentatione in Globis ac Mappis, alijsq[ue] affectionibus. Terraru[m] orbem divido in partes sex, Europam, Asiam etc. singulasq[ue] describo, ac in sua regna, provincias etc. divido etc. XIII. Liber est de Hydrographia, agitque breviter de Limeneuritica et Histiodromica, hoc est, de arte portum inveniendi, deq[ue] via navis ad portum etc. XIV. Liber est de Horographia, in quo praemisso Apparatu horographico, succinctè et sine demonstrationum parergis, summâ varietate propono modos omnis generis horologia construendi, idq[ue] geometricè per lineas, arithmeticè per numeros, organicè per instrumenta, in superficiebus quibuscunq[ue], radio directo, reflexo, refracto. XV. Liber est de Mechanica, seu gravium movendorum scientia, in eoq[ue], praemissis Definitionibus, Hypothesibus, ac fundamentalibus Propositionibus, explico quinque Machinas fundamentales, Vectem dico, Axem in peritrochio; Trochleam, Cuneum, et Cochleam, quibus potentia iuvatur etc. ac insuper propositionem inter vires motrices et pondera etc. nec non machinalium motionum causam etc. XVI. Liber est de Statica, seu gravium ponderandorum scientia. Continet Statica Elementa, Instrumenta, Praxes. XVII. Liber est de Hydrostatica, seu arte tam liquida librandi, quàm solida in liquido ponderandi. Continet Hydrostatica Elementa, Theoremata, Problemata. XVIII. Liber est de Hydrotechnica, agit[ue] de illis Machinis aquaticis, quae aquae et spiritus ope construuntur. Explico breviter quatuor dictarum Machinarum principia, alibi fusiùs explicata; et in situ singulo paucas Machinas constructas affero. XIX. Liber est de Optica, in quo postquam de oculi structura, et partibus, et de eius obiecto et obiecti radiatione, de visione et modo videndi egi; affero Hypotheses Opticae practicae, ac brevissimè organicum delineandi modum praescribo; geometricum verò, quoniam paucis tradi non potest, omitto. XX. Liber est de Catoptrico, traditque Catoptricos Definitiones atq[ue] Hypotheses; varias speculorum proprietates, tum omnibus speculis communes, tum planis, sphaericis, cylindricis, conicis, peculiares. Non pauca etiam de causticis speculis habet. XXI. Liber est de Dioptrica, ac praeter Dioptricas Definitiones, atq[ue] Hypotheses, vitrorum refringentium figuras et proprietates explicat. XXII. Liber est de Architectura Militari, non universa sed moderna; non de novo conscripta, sed ex optimis Auctoribus collecta. Agitur in eo de munimentorum tam regularium, quàm irregularium delineatione, orthographia, ichnographia etc. Succinctè, et ut puto, methodicò et solidò procedo. XXIII. Liber est de Polemica Offensiva ac Defensiva, continetq[ue] modu[m] hodie usitatum urbes obsidendi, oppugnandi, ac defendendi; nec non tormenta bellica dirigendi. Nihil novi dico, sed Omnia ex optimis Auctoribus collegi. Brevissimè sed methodicò procedo. XXIV. Liber est de Tactica ducitq[ue] primò Tacticam castrorum seu castrametationem; deinde Tacticam acierum, seu aciei instructionem. Utramq[ue] breviter, et prout num in usu est, trado, ex optimis collectam Auctoribus. XXV. Liber est de Musica, brevissimamq[ue] introductionem in Musicam, tum veterum Graecorum, tum modernam Latinorum continet, cum regulis nonnullis in Melopoeia servandis. Haec summa est Mathematici Cursus. In omnibus mihi utcunq[ue] satisfacio praeterquam in Astronomia Theorica, et in Musica. Limatissimum R[eveerent]ia et P[atris] Athanasij iudicium exspecto. Quaero nunc qui Opus sumptibus suis imprimat; erit enim magnorum sumptuum, propter ingentem figurarum numerum quas omnes ligno incidi cupio, paucis exceptis. Post mensem unum, quem in figuris delineandis insumere debeo, redibo

◅▻