Contrapunctus Musicus.
QUoniam Saepe jam facta est mentio, fietque frequenter in sequentibus,contrapuncti musici; explicandum in gratiam Tyronum, quid eo nomine intelligatur.
Pro intelligentia autem suppono, artificium novae Musurgiae in eo potissimum consistere, ut, data una e quatuor Vocibus (sive Bassus sit, sive Cantus, sive Tenor, sive Altus) reliquas Voces componamus, ponendo primo quidem puncta, deinde loco punctorum notas harum contra notas illius , ut patet ex praecedentibus, et patebit iterum ex sequentibus.
Contrapunctum igitur musicum , vel potius contrapunctionem hic appellamus, quando Voci uni datae, notisque in Pentagrammo suo expressae, contraponimus in aliis Pentagrammis aliarum Vocum primo puncta, deinde eorum loco notas musicas, consonantiam inter se et cum prioribus notis efficientes. Ex his patet, cur hic componendi modus dicatur Contrapunctus, seu Contrapunctatio.
Contrapuncto divisio.
Dividitur Contrapunctus in Simplicem, Floridum, et Coloratum. Simplex est, in quo nulla notularum musicarum , et consequenter nulla temporis seu mensurae varietas est in una Voce comparata cum altera, sed punctus contra punctum , seu nota contra notam aequalis in omnibus Vocibus valoris ac mensurae ponitur, ut ex dictis supra patuit, et in sequentibus iterum patebit. Floridus est, in quo contra notas datas in una Voce, aliae notae diversae speciei et mensurae ponuntur in aliis Vocibus vel omnibus, vel aliquibus saltem. Et hic ut difficilior, ita etiam plerumque suavior est priore. Coloratus est, qui constituitur ex diversorum signorum notularumque contrapositione, ita ut non ejusdem mensurae notae contra notas tantum, ut in Simplici, nec diversarum mensurarum notae contra alias, ut in Florido, ponantur; sed oer discretas concordantias, pro multiplici signorum
