Page:Romani Collegii Societatis Jesu Musaeum Celeberrimum 1678.pdf/39

Quadrigas Serapidis, Bellerophontis, Pegasum, aliaque antiquorum commenta imitari simili arte poteris.
Quarto: Ara Magnetica. Vitreum Coelum immortali dignum fama, Archimedes fabricasse fertur, in quo omnes Coelestium corporum motiones, itinera, intervalla, proportiones tam ingeniose aptavit (ut refert Papus Alexandrinus) ut non solum Graecia universalis, sed et totus orbis ad tam audax naturae et potius Artis prodigium attonitus obstupuerit, et hodie admiretur. Archimedae Sphaerae similem, non unam, sed tres ostentat huius Musaei ara Magnetica, quae in medio Musaei ambulacro Authoris ingeniosa dispositione superbit.

COLUMBA ARCHITAE
magnetica arte exhibita
Cum studio [...] volat ecce Columba per orbem.
Non rota; nec ventus; sed lapis urget opus.

Sunt itaque harum vitrearum orbitarum tres, quarum media et grandior fluitantis humidi, pendulum Orbis terreni globum in centro refert, quae ponderibus ipsa suis librata, et motu occulti ducis, magnetem circa suum