Page:Romani Collegii Societatis Jesu Musaeum Celeberrimum 1678.pdf/13

porro marina hujus ovati centro intra orbem seu stellam nauticam pendula mirificum sympathiae experimentum monstrat, scilicet piscis est volatilis, qui undique lateralibus fenestris ac rimis occlusis forinsecus spirantis aurae proditor est; uti Auctor in libro cui titulus, Regnum Naturae Magneticum, id est, de triplici magnete in animato, vegetabili et sensitivo, pulchre describit.
Tertium ovatum ὑδρόχοον virum exhibet aquarum flumina ex urna in subjectam humum despumantem; et elementi aquei emblema est ad scientiarum multitudinem significandam et his circumscriptis effatis clarum. Primum ex Kabala Hebraerum hujus sensus. Non est herba inferius, quae non habeat planetam sibi correspondentem in firmamento, qui percutiat eam, et dicat ei cresce. Alterum effatum est in idiomate Samaritano a Seduna prolatum, estque hoc. Qui noverit mysterium inferioris et superioris mundi nexumque rerum in iis abditarum, is altissima montium arcana penetrabit.
Quartum ovatum formosae pulchritudinis et modestae gracilitatis juvenem effigiat Cornucopiae rosarum, liliorum, omnisque generis florum, et frugum abundantia prodigum terrae symbolum, et Auctoris in mirandis terrae arcanis enucleandis genium exprimens, his clarum iscriptionibus. Prima ex Platone in Cratylo: Nihil dulcius quam omnia scire. Secunda ex Beda de natura rerum: Is sapientiae virtutis officinam vere ingressus dici potest, qui in artis et naturae operibus Deum assidue contemplatur.
Quintum et ultimum ovatum fluctuantem in medio universi molem repraesentat, coelestibus Zodiaci signis interdistinctam, cujus latera hieroglyphica effata illustrant. Primum effatum Persicum dicit: Quicunque radicem superioris et inferioris ordinis penetraverit, illum nihil mysteriorum in mundo latebit. Secundum effatum est ex Mar Isack Syro transsumptum: Disce sapientiam fili mi, illa enim sceptris Regum traestat, hominesque omnibus bonis, quae desiderare possunt implet. Tertium est ex Muchi Aethiope Philosopho desumptum: Gehon fluvius est in coelo, qui respondet Gehon, id est Nilo. Est Nilus in terra, cujus Mysterium si coeperis, omne desiderium animae tuae implebitur.
Totum reliquum spatium hieroglyphicis notis, tractibus Arabicis, florum et corymborum variarumque figurarum textura et serie et decore circum ovata caetera spatia ambiunt eo ordine ut omnium oculos et animos facile in sui variegati coloris contemplationem rapiant, et quae mystariosa majestosaque quadam allusione suaviter in spectantium animos sese insinuent.