Page:Prodromus coptus sive aegyptiacus (1636).djvu/126

verò interdùm, glareis lacessant operarios, rarissimè tamen eos laedunt. Nec laedunt unquam, nisi priùs ipsi cachinno fuerint, aut maledicto lacessiti, non dissimiles iis daemonibus, quos Gutelos, aut Trullas Germani vocant. Quos sexu, tàm mulieris quàm viri ementito, cùm apud alias nationes, tum apud Sueones maximè in famulatu fuisse ferunt. Haec Georg: Agric:
Cui astipulantur quotquot in visceribus terrae auro scrutando operam dant; atquè ex horum numero ego dictos Pygmaeos, si quando ab hominibus visi sunt fuisse sentio, qui homunculorum specie, in caliginosis huiusmodi regionibus, ad quas damnati sunt, apparentes, hominibus fabulae de Pygmęis cubitalibus gruum antagonistis, occasionem praebuerint. Atquè hanc opinionem haud improbabilem esse, is facilè cognoscet, qui ea, quae de daemonum spectris in septentrionalibus regionibus passim comparere solitis Olaus, Iornandes, et Marcus Venetus de deserto Lop in Cathaio tradunt, diligenter fuerit perscrutatus.
Porrò De vastis volucribus, seù Gryphibus Hyperborreis. p. 9. clim. 7. haec tradit Geographia.