Page:Obelisci Aegyptiaci Interpretatio hieroglyphica 1666.pdf/115

spirituali seu intellectuali complicata contemplabantur; cuius symbolum erat phallus in Obeliscis, et in Tabula Bembina exhibitus, quem intellectualis Mundi simulachra praeferunt, vel appositum habent, quo res omnes seminalibus rationibus refertae indigitabantur: Angelus enim quem Aegyptii Genium dicebant, omnia secuin gerit et habet, Angelico et spirituali modo, imò totam Mundi machinam in se complicat; imò quicquid Natura et ars per naturam potest, id etiam Angelus super Naturam et artem constitutus et elevatus, praestantiori modo potest. Cum itaque talis sit Angelus, certè primam et supremam causam, ex seipsa existentem, independentem, omnia secum invisibili et incomprehensibili modo in Divinitatis abysso, et in fontali unitate simplicissimè complicare, censeri debet; tanquam eum, qui est omnia in omnibus, prima scilicet et ultima rerum causa: omne enim causatum, ut Aegyptii loquuntur, manet in sui causa, et progreditur ab ipsa, et convertitur ad ipsam, ut flos Loti ad Solem, cum omnis progrestus per similitudinem secundorum ad prima efficiatur. Nam à supremo intellectu per Fundum suum paternum primò prodiit lux, id est, Angelicus Mundus, ex luce illa invisibiles rerum virtutes, quas nonnulli astra vocant, ex astris Mundus sensibiles ex quatuor sibi elementis compositus, et sic omnia sunt in omnibus suo modo, et unum manet in altero, sicut semen in arbore, et arbor in semine; omnia corpora seu elementa visibilia sunt in astris invisibilibus seu spiritualibus elementis, et astra sunt in corporibus, astra sunt in Angelis, et Angeli sunt in astris: Angeli sunt in Deo, et Deus est in Angelis. Sicuti igitur in Deo omnia sunt divinè, ita in Angelis angelicè, in Mundo sunt omnia corporaliter, et contrà. Tota Mundi machina in Deo... est Deus in Angelis, Angelus in astris, astra; et sicuti semen est arbor complicata, et arbor est semen evolutum, ita Deus est Mundus complicatus, et Mundus, ut ita dicam, Deus ad extra evolutus. Nam ut rectè Proclus: omnis Divini ordinis per omnia permeat foecunda, et dat seipsum omnibus inferioribus generibus, id est, in suprema omnium mente; vis foecundativa, verbi gratia, est in Angelis suo modo, in animabus, coelo, elementis, et ex his compositis, animalibus, plantis, lapidibus, caeterisque entium gradibus, in singulis suo modo; defert enim unumquodque à propria proxima causa proprietatem, secundum quam illa substantiam sortita est; lapis enim foecundativae virtutis est particeps, in quantum ei multiplicari convenit materiali faecunditate; planta verò eiusdem particeps est vitaliter, animal sensitivè, Coelum motivè, anima rationabiliter, Angelus intellectualiter, Deus superestentialiter, uniformiter et divinè; universa series eandem habet potentiam ad unam Divinam causam, uti Theologia Aegyptiorum lib.10.cap.2.ostendit.
CA

◅▻