Page:De scriptoribus ecclesiasticis liber unus (1613).pdf/36

◅▻

De scriptores ecclesiasticis

p. 18

Sed multo probabilius est, auctorem fuisse Mardochaeum patruum, & nutricium ipsius Esther & qui illi semper adfuit & res gestas omnium optime nouit. Vide plura, si placet, in controuersiis nostris lib. 1 de Verbo Dei cap. 7.

[30.] De LXXII interpretibus & Aristaea – 3720

Anno decimo septimo Ptolomaei Philadelphi regis Aegypti, qui fuit annus mundi ter millesimus septingentesimus vicesimus, facta est ceeberrima ila versio sacrarum scripturarum ex lingua Hebraica in Graecam, a septuaginta duobus viris doctissimis, non sine miraculo diuino, conuenientibus tot hominibus in unam & eandem versionem, ut scribunt Philo lib. 2 de vita Mosis, Iosephus lib. 12 antiqu. cap. 2 Tertullianus in Apologetico cap. 18 Athanasius in Synopsi, Epiphanius, de mensuris & poneribus & Augustinus lib. 18 de Ciu. Dei cap. 45 sed Epiphanius non solum nominat regem, sed etiam annum 17 regni eius. Qui fuerint viri illi doctissimi & nomina exponit Aristaeas in suo libro de septuaginta duobus interpretibus, qui extat in bibliotheca sanctorum Patrum tomo 7 editionis secundae. Et quamuis aliqui recentiores existiment, Aristaeam, qui nunc extat, non esse illum, qui vixit tempore ipsorum septuaginta interpretum, sed confictum ab HebraeisL tamen vere esse illum ipsum, satis probatur ex eo, quod omnia, quae citant ex Aristaea Iosephus lib. 12 antiqu. cap. 2 Tertullianus in Apologetico cap. 18, Eusebius libro octauo de praeparatione Euangelica capite primo & sanctus Hieronymus praefatione in Pentateuchum, inueniuntur in hoc nostro ad verbum.
Vide, si placet, de LXXII interpretibus in nostro libro 2 cap. 6 de verbo Dei.

[31.] De Iesu Sirach – 3759

Iesus Sirach, qui auctor est libri sacri, qui dicitur Ecclesiasticus, vixit tempore Ptolomaei Euergetis regis Aegypti, ut ipse testatur in praefatione ad librum suum: ipse autem se nominat Iesum Sirach in fine capitis quinquagesimi. Hunc sacrum librum haeretici recentiores contemnunt, sed eum, ut diuinum & sacrum agnoscunt Patres concilii Carthaginensis tertii cap. 47 & Trident. sess. 4. Item Pontifices, Innocentius in epistola ad Exuperium & Gelasius in Decreto de libris sacris: item sanctus Augustinus de doctrina Christiana cap. 8 Epiphanius in haeresi Anomaeorum, Cyprianus lib. 3 epist. 9 Clemens Alexandrinus lib. 7 Stromatum, & alii.

◅▻