De scriptoribus ecclesiasticis
p. 210
[360.]
De Barlaamo – 1303
Barlaamus episcopus Hieracensis, vixit circa annum Dom. 1303. Scripsit epistolas multas ad Graecos de unione cum ecclesia Romana, quas edidit Henricus Canisius num. 6 antiquae lectionis.
[361.]
De Siffrido – 1305
Siffridus presbyter Misnensis eodem tempore scripsit epitomen historiarum libris duobus comprehensam anno Domini 458 usque ad annum Dom. 1307.
Extat hoc opus impressum cum aliis historia Germaniae.
[362.]
De Nicephoro Callisto – 1305
Nicephorus Callistus historicus Graecus, vixit tempore Andronici Senioris imperatoris, cui dedicauit historiam suam; proinde vixit post annum Dom. 1300 Historia, quae nunc extat Nicephori Callisti, continetur libris octodecim & incipit a natiuitate Christi, ac desinit in annum eiusdem 625. Credibile autem est multo plures ab eo libros scriptos fuisse sed periisse.
Porro in historia huius auctoris ut Graeci & schismatici, non mirum videri debet, si inueniantur errores proprii Graecorum, ut de processione Spiritus sancti solo patre, in ipsa praefatione. Magis mirum est, inueniri non paucos errores in rebus historicis, ut ex annalibus Card. Baronii constat.
[363.]
De Eberardo – 1305
Eberardus archidiaconus Ratisponensis scripsit Chronicum ab anno 1273, usque ad annum 1305. Vide Henricum Canisium primo tomo antiquae lectionis.
[364.]
De Petro Aureolo – 1317
Petrus Aureolus ordinis Minorum ex Prouinciali Aquitaniae, archiepiscopus Aquensis, floruit anno dom. 1317 & multa scripsisse dicitur, sed Commentarium in primum librum sententiarum, idque solum Romae impressum vidi, anno 1516.
Citantur multa ex Aureolo apud Ioannem Capreolum, sed ea typis mandata non extant.
