Ab anno Domini 1300 ad 1400
p. 211
[265.]
De Antonio Andrea – 1317
Antonius Andreae, natione Aragonius, ordinis sancti Francisci, Scoti discipulus, scripsit In quatuor libros sententiarum, quod scriptum editum est Venetiis anno 1578.
[266.]
De Durando a sancto Portiano – 1320
Durandus a sancto Portiano, natione Gallus, ordinis Praedicatorum & episcopus Meldensis, theologus insignis, scripsit In quatuor libros Magistri Sententiarum commentaria satis dilucida, in quibus quamuis nonnulla scipserit, quae a communi Doctorum sententia abhorrent, quaedam etiam ab ecclesia improbata sunt, ipse tamen in praefatione commentarii sui in Magistrum, disertis verbis asseruit ad ecclesiam catholicam Romanam pertinere iudicium de doctrina, seque omnia sua scripta eiusdem ecclesiae censurae submittere.
Scripsit etiam librum egregium De origine iurisdictionum.
Floruit circa annum Domini 1320.
[267.]
De Herueo Natali – 1320
Herueus Natalis Brito, ordinis Praedicatorum magister generalis & Durandi aequalis, ac theologus doctissimus.
Scripsit in epistolas sancti Pauli, quod opus habetur inter opera sancti Anselmi, ut supra diximus.
Scripsit etiam in quatuor libros Magistri sententiarum.
Item scripsit tractatum De potestate papae.
Alium De sacramentis.
Alium De Christi & apostolorum paupertate.
Alium De utraque potestate papali & regali.
Alium De beatitudine.
Item scripsit Quodlibeta.
Item librum Aduersus Durandum, in iis, in quibus a sancto Thoma dissentit.
Et seorsum librum De unitate formarum contra eundem.
Nec non libros aliquot contra Henricum a Gandauo.
Et multa alia philosophica scripsit.
De materia caeli.
De aeternitate mundi.
De voluntate.
De secundis intentionibus.
