De scriptoribus ecclesiasticis
p. 134
[190.]
De Liberato – 560
Liberatus Archidiaconus Carthaginensis vixit paulo post quintam synodum, ut ex eius Breuiario intelligi potest; scripsit enim Breuiarium de causa Nestorii & Eutychetis; quod Breuiarium extat in 2 tomo Conciliorum & caute legendum est; siue enim ab aliquo deprauatum fuerit, siue ipse auctor non bene assecutus sit historiae veritatem, non pauca in eo videntur esse perperam scripta.
[191.]
De Venantio Fortunato – 570
Venantus Fortunatus episcopus Pictauiensis, floruit doctrina & sanctitate tempore Iustini iunioris, scripsit vitam sancti Hilarii, quae extat apud Surium die 14 Ianuarii; scripsit plurima carmina sacra, quae extant in Bibliotheca sanctorum Patrum tomo 8 edit 2 sed in ecclesia celebrantur maxime illa de sancta cruce: »Vexilla Regis prodeunt«; & »Pange lingua gloriosi«.
[192.]
De Euagrio – 596
Evagrius Scholasticus scripsit historia ecclesiasticam libris sex, ab eo tempore in quo desiit Sozomenus ussque ad annum duodecimum Mauritii imperatoris, id est ad annum Domini 597.
[193.]
De sancto Gregorio Turonico – 596
Gregorius Turonensis episcopus floruit imperante Mauritio & sancto Gregorio papa aliquanto senior fuit; siquidem anno septimodecimo inchoante episcopatus Gregorii Turonici, Gregorius papa creatus est; & anno vicesimo primo completo in episcopatu suo Gregorius Turonicus obiit; cui superuixit Gregorius papa annis octo. Itaque Gregorius Turonicus obiit anno Dom. 596. Gregorio autem papa anno Dom. 604. Haec ex Breuiario vitae S. Gregorii Turonici & ex vita S. Gregorii papae decerpta sunt. Scripsit sanctus Gregorius Turonicus:
De historia Francorum, lib. 10.
De gloria martyrum, 1.
De gloria confessorum, 2.
De miraculis sancti Iuliani, 1.
De miraculis sancti Martini, 4.
Epitomem historiae Francorum, 1.
