Ab anno Domini 500 ad 600
p. 133
[186.]
De Martino Dumiensi, alias Bracarensi – 560
Martinus Dumiensis monasterii abbas, ac deinde ecclesiae Bracarensis episcopus, vixit circa annum Domini 572, nam praefuit concilio secundo Bracarensi, quod habitum est era 610, id est anno Domini 572, sed videtur anno sequente obiisse, ut notat Card. Baronius.
Scripsit Collectionem canonum ex Graecis synodis, qui extant in tomis Conciliorum post secundam synodum Bracarensem. Scripsit etiam de quatuor virtutum cardinalium differentia & alia, quae extant in tomo quinto Bibliothecae sanctorum Patrum editione 2.
Meminit huius Martini S. Isidorus in Catalogo scriptorum ecclesiasticorum cap. 22 & in libro De viris illustribus cap. 35.
[187.]
De Procopio Gazeo – 560
Procopius Gazeus sophista, cuius meminit Photius in sua Bibliotheca, scripsit In octateuchum commentaria magis ex aliorum libris, quam ex propio ingenio.
Scripsit etiam in Isaiam, quae extant excusa Parisiis, Graece & Latine.
Dicitur etiam scripsisse in libros Regum & Paralipomenon, quae opera utrum extent, ignoro.
Quando vixerit, non certum est, sed posuimus eum post annum quingentesimum, quia nec sanctus Hieronymus, nec Gennadius, neque alii, qui scripserunt ante annum quingentesimum, hunc auctorem nominauerunt.
[188.]
De Ioanne Climaco – 560
Ioannes Climacus monachus religiosissimus scripsit Librum triginta graduum, quibus ascenditur ad perfecionem, unde ipse nomen Climaci inuenit.
Existimant aliqui recentiores illum floruisse anno Domini 340, sed non putamus id esse verum, tum quia nemo veterum hoc dicit, neque ex ipsius libro id colligi potest, tum quia in eo libro fit mentio sancti abbatis Sabbae, qui tempore Iustiniani imperatoris obiit anno Domini 532, ut refert Card. Baronius tom. 6 Annalium.
[189.]
De sancto Dacio Mediolanensi – 560
Sanctus Dacius episcopus Mediolanensis vixit tempore Iustini imperatoris, teste sancto Gregorio libro 3 Dialogorum cap. 4 & scripsit Chronicum, in cuius Chronici lib. 1 cap. 10 tradit, canticum »Te Deum laudamus« compositum fuisse a sanctis Ambrosio & Agustino.
