Quodque magis horreo, rursus auditum tonat
quondam Parisiis fulmen: heu, fulmen meas
incendit aures; pectus at stringit stupor,
et gelidus imis errat in fibris tremor.
Loyola, quo me flectis? Elanguet dolor,
vetatque tristes amplius flammas ali.
Eiuro facinus.
Abit.
SCENA SECUNDA
MUDARRA, BERRIERA, CASTILLA,
NAVARRUS.
Mudarra ac socii frustra persuadent Nauarrum, vt incepto scelere persistat.
MUD. -Bellua inconstans fugit. -
BER. Quis te, Nauarre, turbo velocem rapit?
Vitasnè amicos? NAV: Vito sanguineas tigres;
ad saeua quisquis scelera malè cautum trahit,
non est amicus, hostis est, vrsus, tigris.
Valete. CAS. -Dubiae Sphingis ambages moues.
Quae belluina monstra, quod fingis nefas?
NAV. -I<m>mane duco premere non sontes nefas.
MUD. -Insons habendus, Roma quem statuit reum?
NAV. -Insons habendus Diua quem soluit Themis.
CAS. -Nigrescit atra concolor menti toga.
NAV. -Atram dealbant candidi mores togam.
BER. -Reclamat orbis. NAV. Melior acclamat polus. Non bene reprendit terra, quem caelum probat.
MUD. -Caelum probabit scilicet terrae luem.
NAV. -Paludis imum testor infernae lacum!,
MARGINALIA: Detinetur. Iterum abit ac detinetur.
