addetque novum Loyola decus,
ferrea in terris vincula solvet,
HOS. -Non hic laboris limes: animarum viret
vbique messis. Domina te supplex opem
Italia poscit, patrium exposcit solum
sceptrifera tellus, bellicae prolis ferax
Hesperia: quicquid circinat gremio Thetis,
a te flagranti anhelat auxilium prece.
Non te cöercet arctus Europae sinus,
domabis orbes verus Alcides novos:
en quae remotum discolor Gangem bibit
India, diei prima redivivae domus,
America diues, Japonum Martis potens
insula, superbi China dominatrix soli,
et quicquid Oriens, gentium quicquid parit
occiduus Orbis, milite subactum tuo,
ultro expetitae colla supponet cruci.
Inter astra et nubila in superiori loco
ostenditur Jesu nomen stellis cinctum,
circumpendentibus coronis sceptrisque
regnorum quae ab Ignatii sociis producta sunt.
Vides ut aureus cingit astrorum cyclus
Jesu tremendum nomen? Vt regum supra
densae coronae fulgurant? Ut pendula
hinc inde sceptra pondere corusco micant?
Tui tot olim posteri Christi iugum
subire cogent regna, tot Reges ferum
curvare Jesu nomini cogent genu.
