Frustra minacem malleum iratus vibras,
molemque tentas vertere. Perennis tuos
effugiet ictus, celsius culmen feret
quo plura tacito saecla volvis turbine.
Age, experire, terrere si molem queas.*[1]
MYS.: Horae volucres cedite: Facessat Chronos.
Virtutis opera tempus incassum terit.
S<ANC>TUS IGNATIUS CUM PRIMIS
NOVEM SOCIIS, CANDIDUS CAET.
Hortatur S<anc>tus Ignatius socios ad gratias
Deo agendas ob felicem successum et ad
conversionem orbis inflammat.
Raptus in ecstasim praecipuos
Societatis progressus primus
IGN.*[2] Votiva laudum pensa caro numini
solvite sodales, solvite. Ereptus salo
tenuis phaselus, tutus in portu natat
Quis non amore numinis totus flagret?
Seu mulcet eius blanda mortales manus,
seu cum flagellat, semper ex aequo favet.
Et aura quo serena blanditur magis,
eo excitatior incubet nobis labor
Ubique messis foeta sollicitos vocat
ad se colonos; una nec tellus patet.
Scrutemur orbes alta per maria invios.
Quodcumque Titan perspicax usquam videt
vestigia terant nostra, nostro pareat
