Hydrâ ferocius, astra diffugiant licet
fugiatque tellus trepida succusso solo.
Adesto Furia, fraudis ostenta tuae
trophaea superis rapta: luctificum procul
sonuit gementûm murmur, audimur, venit.
2.[1]
O grata furiis spectra! Nunc tellus gemat,
triumphet Erebus, astra conscendat dolor,
frustra trisulco fulminet telo Deus.
ERYNNIS NIGRIUS
Erynnis varias provincias Lutheri
peste infectas ostentat. Excitatur
a Nigrio ad excidium Romae
urbis, et Sancti Ignatii caedem.
Ad viri nomen tanquam
fulmine icta retruditur
in orcum. Nihilominus
Nigrius Alpinum adhuc
dormientem furiali
accendit taedâ ad
coeptum scelus
ERY. -Hoc ego tributum pendo Tartareo Duci,
haec spolia victrix foribus appendam nigrae
Plutonis aulae, plura Lutherus vovet.
Laxentur Erebi claustra: sunt arctae fores.
Inceste genitor, perge, densetur tuis
meisque spoliis mortis inmensum Chaos,
avara donec Tartara inclament satis.
- ↑ 2.Exit Erynnis essedo nigro invecta ferreisque catenis aut funibus post se trahit varias provincias haeresi infectas Lutherianâ