Page:APUG 1123.pdf/9

ut mihi rependat servus aeternas vices.
Hac lege servit Erebus, hac Erebum colit
humana gens. Si forte desideo domi,
monstri ebriosi semper obsideo latus;
frequensque socius, inter obscenas dapes,
misceo Lyaei pocula veneno Stygis;
at primus omne propino sitienti nefas.
Contagiosum gurges exorbet merum,
atque inde crudo pectore impuri vomit
Furoris atrum virus, ac diram luem,
qua solis impallescit aetherium iubar
ac purioris aura nigrescit plagae.
Nec tarda serpit pestis, ut pestes solent:
turbine celerior perculit late solum,
et aucta eundo, more torrentis ruit,
subitisque mundum involuit attonitum malis.
En occidentis imperî tandem labat
occidua moles: ardet in medio gelu
Arctoa tellus, gelidus ad flammas suas
Teuto expavescit, igne Lutheri furens.
Novi Britanno fluctuant aestus salo;
tumultuatur Belga, vicino excitus
ardore; Gallum Stygius ambussit vapor,
quem per Lemannum progerit Auernus lacum.
et quotquot usquam frigido Plaustro rigent
Lutheriano conflagrant incendio.
O fausta spolia! O victimas Diti sacras!
Huc huc Erynnis, ultimo ex orci specu,
recens Erynnis, nata Luthero patre,
Lernaea proles, prome viperium caput

◅▻