Page:Organum mathematicum libris IX. explicatum (1668).djvu/593

poli Viennensis convenientem. Hoc peracto, accipe corneum ac transparentem semicirculum, in Receptaculo basis repositum, in gradus suos sive duos Quadrantes divisum; ducta in plano aliquo linea Meridiana A B, ad lineam C D horae sextae recta, applica corneum semicirculum supra lineam C D, ita ut centrum semicirculi respondeat puncto A lineae A B. Post haec accipe horariam Tabellam nigro colore imbutam, quam pone prope Tabellam 48 graduum, et vide, quis gradus respondeat horae undecimae et primae, et invenies gradus 11, minuta 17. Hunc quaere in semicirculo corneo a B utrimque; et per impressa puncta si ex centro A lineas duxeris, erunt illae lineae horae primae et undecimae. Deinde vide, quinam gradus correspondeant horae 2 et 10, hos inventos in Tabella 48 quaere in limbo semicirculi a B versus C et D, et habebis puncta, per quae lineae ductae ex centro A, dabunt horam 2 et 10. Et hoc pacto procedes usque dum omnes horas descripseris, et habebis Horologium finitum.

◅▻