EX dictis hoc Capite,de Contrapuncti simplicis Melopoeia ope Tabularum Musarithmicarum,et praecedentibus de eadem Melopoeia ope Bacillorum et Abacorum Musurgicorum, nec non via ordinaria Musurgis usitata, intelliguntur melius,quae Auctor Organi docuit in Libello supra posito §. 2. Praxi prima, de compositione ejusdem Contrapuncti simplicis ope earundem Tabularum Musarithmicarum. Relege igitur, quae ibi habentur, et intelliges , si nostra intellexeris.<br
Melopoeia Contrapuncti floridi.
COntrapunctus Floridus est, ut supra etiam dixi, quando non punctum contra punctum, seu nota contra notam aequali gradu et mora temporis, ut hactenus factum,ponitur in omnibus quatuor Vocibus,sed eae variis diminutionibus, fugis, ac syncopationibus, variaque notarum consonarum ac dissonarum concordantia, veluti floribus quibusdam exornantur.
PRo florido Contrapunctum concinnavit Auctor Organi in Lib. 8. Musurgiae secundum Syntagma Tabularum Musarithmicarum in sex Pinaces seu Columnas distinctum, pro variis metrorum generibus; singulisque numerorum seriebus apposuit ad latus dexterum correspondentes notas, non pares numero pro singulis Vocibus,id est,non tot pro Cantu,quot pro Alto, Tenore, et Basso (ut in praecedentibus factum pro Contrapuncto simplici) sed pro aliquibus Vocibus plures, pro aliis pauciores,prout major vel minor est Vocum diminutio; et Prout plures aut pauciores figurae
