Page:Prodromus coptus sive aegyptiacus (1636).djvu/127

Continet haec pars 9. climatis 7. partem Terrae Iagog, Magog interioris, partem maris picei; narrat Author libri rerum mirabilium, quod ad introitum regionum Iagog, Magog fluvius sit dictus Almashar, inexplorabilis profunditatis. Et occisorum in praelio corpora in hoc flumen proiecta, simul ac ingentes quaedam Aves conspiciunt, subitò educta in speluncam, quam èlatere Montis habent, deportant ibique corpora eorum devorant. Meminit horum rapacium volucrum quoque Beniaminus in itinerario suo, eosque cira eundem Borealem Cathaiae tractum iuxta quendam maris sinum astro Kesil seù Arcturo subiectum, ac proinde aestuosissimum ponit, in quem cum homines vi saevientis maris fuerint coniecti, irremediabiliter eos mori necesse sit, nisi se ope dictarum volucrum, modo quodam admirabili (quem cognoscere non fuerit iniucundum) eripiant.