Computus Ecclesiasticus est ratio computandi, ac inveniendi per regulas quasdam practicas, ea, quae ad tempus Ecclesiasticum per discendum, ac rite ordinandum spectant, cujusmodi sunt Cyclus Lunae seu Aurei numeri, Cyclus Solis seu Litterarum Dominicalium, Cyclus Epactarum, Cyclus Indictionis, Annus Bissextilis, Novilunia et Plenilunia Ecclesiastica, Aetas Lunae quolibet die mensis, Anticipatio et Post positio ejusdem, decima quarta Luna mensis Paschalis, Pascha cum Festis mobilibus ab eo dependentibus, aliaque multa, ut videbimus. Institui potest hic Computus, invenirique praedicta, aliaque pleraque, triplici via, per Arithmeticam, per Tabulas in eum finem constructas, et per Digitos seu digitorum Articulos memoriter; quam postremam viam Dactylismum Ecclesiasticum vocare possumus cum Pompejo Limpio, qui quatuor elegantes Libros de illo scripsit. Primam viam explicavimus
