Page:EBC 1620 06 18 2255.pdf/1

Ill.me et R.me D.ne.
Quamvis certo certius noverim Ill. D.V. fictis narrationibus et nugis R. Celai abbatis et P. Cuveronii provincialis aliorumque Franciae Coelestinorum edoctam, non ita, ut solita erat, sereno oculo, nos nostraque intueri: attamen ne Letheis ingratitudinis undis plurima beneficia a vobis accepta obrui patiar, aut partes veritatis deseruisse, me aliqui putent et dicant, has humilitatis et obedientiae calamo litteras Ill. D.V. scribere decrevimus. Nollem enim Ill. D.V. nos coenosa oblivionis beneficiorum abysso immersos opinari, aut operculo silentii puteum Democriti occludere, ne veritas in medium prodeat, existimare. Beneficia gratias immortales expetunt, et veritas cancellos taciturnitatis eggredi imperat. Vera autem coram Deo et Ill. D.V. luquar. Nam cum crastina luce exacto tyrocinii nostri anno monastica Deo iterum vota sim nuncupaturus, et per professionis Benedictinae reformatae commercium, quasi secundo baptismo, omnium peccatorum veniam consecuturus sim, satius esset vitae nostrae stamina dissecari quam falsa loquendo aut vera tacendo tale absolutionis commodum spernere aut impedire. Mense Maio anni proxime elapsi cum Benedictinorum reformatorum congregationem perfectam peterem, et deposita veste Caelestinorum habitus illius insignibus decorarer, si bene memini, Ill. D.V. nos maximam quaerimoniarum segetem adversus dictum Celsum habere scripsimus, nolle tamen eas in medium proferre, sed potius reformationis ablegatae, et nostrae innocentiae laesae negotium Dei providentiae committere velie, ut nobis bene esset adversa multa pro justitia et reformatione pertulisse. Verum quia Celsus quicquid perpetam egit in nostro negotio nova et inaudita arte, breve subrepticium ipso facto nullum et irritum per foedera sive concordata inter Sedem Apostolicam et nostros Reges inita, obtinens, tueri vult et defendere, operae pretium duxi beneficia ab Ill. D.V. accepta, narrando totius historiae veritatem paucis contrahere; non ut denuo litigetur, sed ut Ill. D.V. videns nos injurias amore Dei remittere
---page break---

▻