Ab anno Domini 300 ad 400
p. 69
[92.]
De Gregorio Baetico & Sebadio Agennensi
Gregorius Baeticus in Hispania & Sebadius siue Phegadius, siue Phebadius Agennensis in Gallia, eodem tempore, quo S. Athanasius, & S. Hilarius, Aduersus Arianos librum quisque suum edidit.
Meminit horum auctorum & librorum S. Hieronymus in libro De scriptoribus ecclesiasticos & libri ipsi nunc extant in Bibliotheca S. Patrum tomo 4 Phegadii vero mirae laudes extant apud Sulpitium libro 2 Historiae
[93.]
De Paciano episcopo Barchinonensi – 360
Pacianus episcopus Barchiononensis obiit Theodosio imperante & scripsit epistolas tres contra Nouatianos, quarum meminit S. Hieronymus in libro De scriptoribus ecclesiasticis.
Nunc vero in Bibliotheca S. Patrum, & seorsim in editione Romana anni Domini 1564 non solum extant tres illae epistolae, sed etiam Paraenesis eiusdem Paciani ad poenitentiam, & libellus De baptismo.
Neque aliquid occurrit, unde de eorum librorum auctoritate dubitari possit.
[94.]
De Didymo Alexandrino – 361
Didymus Alexandrinus caecus a prima aetate dictauit opera plurima & nobilissima, teste S. Hieronymo in libro De scriptoribus ecclesiasticis.
Nunc solum extat liber De Spiritu sancto inter opera S. Hieronymi, quoniam eum librum idem S. Hieronymus Latinitate donauit, & expositio in epistolas canonicas in Bibliotheca S. Patrum tomo 9 extat etiam liber Contra Manichaeos apud Henricum Canisium tomo quinto antiquae lectionis.
Claruit sub Valentiniano & Valente principibus.
In eo reprehenditur ab ipso etiam S. Hieronymo, eius alioqui admiratore, quod Origenis errores secutus sit.
Vide Apologiam aduersus Ruffinum.
[95.]
De S. Optato Mileuitano – 365
Sanctus Optatus Mileuitanus episcopus eodem tempore floruit, & egregios septem libros Aduersus Donatistas edidit.
S. Hieronymus in libro De scriptoribus ecclesiasticis sex libros ab Optato scriptos fuisse dicit, sed nunc septem numerantur, neque septimus dissentit a caeteris.
Facile fuit in librum S. Hieronymi irrepsisse errorem in numeris.
