Ab anno Domini 500 ad 600
p. 129
[170.]
De Ferrando diacono – 504
Ferrandus diaconus Carthaginensi, eodem tempore scripsit Paraeneticum ad Reginum comitem, qui extat in Bibliotheca sanctorum Patrum, tomo quinto editionis secundae.
Scripsit etiam epistolas, quae extant Romae impressae.
Scripsit denique breue Compendium sacrorum canonum.
[171.]
De Eugippio abbate – 510
Eugippius abbas Africanus vixit tempore sancti Fulgentii & composuit magno labore tomos duos Thesaurorum sancti Augustini, in quorum priore posuit quaecunque sanctus Augustinus scripserat de rebus obscurissimis, ut de anima, de charitate, de resurrectione, de iudicio, de vita ac morte aeterna.
In posteriore collocauit, quae sanctus Augustinus disputat contra Arianos, Donatistas, Manichaeos & Pelagianos.
Editum est hoc opus Basileae anno Domini 1542 & Venetiis anno 1543, sed cauendae sunt insidiae haereticorum, qui hoc opus in lucem miserunt.
[172.]
De Marcellino comite – 520
Marcellinus comes vixit tempore Iustiniani, nam anno Iustiniani nono & salutis 535 finem imposuit Chronico suo, quod a Cassiodoro valde laudatur libro De diuinis lectionibus cap. 17.
Extat hoc Chronicum in Bibliotheca sanctorum Patrum tomo 7 editionis 2.
Scripsit idem Marcellinus, teste Cassiodoro, quatuor libro De urbe Constantinopolitana & Hierosolymitana, qui libri (ut opinor) non extant.
[173.]
De Ioanne Maxentio – 520
Ioannes Maxentius monachus &, ut creditur, presbyter Antiochenus, vixit tempore Hormisdae papae, contra cuius epistolam scripsit.
Eius opera extant in quarto tomo Bibliothecae sanctorum Patrum.
Scripsit autem Catholicae fidei professionem, item Libellum contra Acephalos, item Dialogorum contra Nestorianos libros duos, item Responsionem ad epistolam papae Hormisdae, in quibus disputat aduersus Nestoriano & aduersus Faustum Regiensem semipelagianum.
Et quidem Faustum & Pelagianos egregie refellit ex libris S. Augustini, ac Nestorianos ita refellit scribens contra Possessorem episcopum Africanum, ut ad Eutychianos declinare videatur.
Certe S. Hormisda papa Possessorem defendit, & Ioannem cum suis monachis acriter inse-
