Romulea Babylon Stygia te fornax cremet.
Me versipellis ante Calvini lares,
sonipes Gehennae, siste: sanguineae necis
is melius artem callet. Imbellem nimis
Lutherus ictum vibrat: ebrioso tamen
a*[1] me salutem, Nigre, Luthero refer
NIG. -Eas; in aula Ditis occurram brevi,
versabo fraudes interim Romae novas
En primus orci faucibus bolus venit.
Navarrus, Nigrius
Scelus suum deflet Navarrus. Eum
conatur Nigrius ad desperationem
adigere. Deprecante S<anc>to Igna<tio>
NAV. -Occumbe sol invise; lucentem diem
altis tenebris merge: fugitivum iubar
caliginosa noctis obvelet chlamys.
Meum pavescit lucis aspectum scelus.
Hic occidentis aureus Phoebi decor
brevis aliis, est nocte concubia mihi
quam bruma tardat longior, Nigri, heus Nigri,
ora pudibunda sceleris obiectu ferit.
Frustra Navarrum praetor absolvis: reum
inimica lux me iudici sistit mihi
ac turpe crimen exprobrat, damnat, notat,
uibice surda, verbere tacentis flagri.
Quis me recessus, quid latebrosi sinus
seponat antri? Praetor exilium imperat
- ↑ *Equum nigrum conscendit clauditur scena
