Page:APUG 1123.pdf/19

Non huc beata caelitum ex aula vehor,
ignotus hospes; frontis auratae notam
iam saepe spectas candidi et vultus ebur,
et fulgurantes luce divina genas.
Iterum revectus nuncium optatum fero:
quas fudit ardor pectore flagranti preces
audiit amicum Numen. Ita Numen solet
vultum nitentem condere ut niteat magis,
sinere molestum vulnus ut feriat minus.
IGN. -Heros beate, prima sydereis rosa
quam dedimus hortis; pectus angustum queror;
debita nec aris vota nec grates tibi
solvere valemus debitas. Solvat manus
quae merita iustis lancibus librat tua.
O dulce numen, dulcis o rerum Arbiter,
ut ludibundo temperas orbem ioco!
Iram meremur vindicem, at blando foves
natos benignus genitor inmeritos sinu.
Hoc restat unum nullus ut viles labor,
timorque nullus arguat. Fortes decet,
ut multa passi, plura deposcant pati.
HOS. -Magnanime Ductor, strenuis nunquam deest
materia votis: mente quod forti voves,
grauida laborum crescet ingentum seges.
En tibi, tuisque saeva graviorem parat
Bellona luctam: totus in bellum flagrat
Erebus. Gigantum prisca Lutherus novat
scelera: scelestis saevior monstris gigas
Aetheria tumido sceptra conculcat pede.
Iam Stygia triste classicum strinxit tuba:

◅▻