Page:Romani Collegii Societatis Jesu Musaeum Celeberrimum 1678.pdf/71

contentus Author, reparare recusavit.
Annulus Mercurii fixi, alio nomine Argentum vivum, aut Lithargyrium, Mercurius dicitur Philosophorum, qui Hermeticam Scholam sectantur, unicum, quod venerantur Idolum, dum eum tanquam fugitivum servum stringere et fixari inutili labore conantur, demum oleum et operam perdentes, in tenues evanescentem auras nuspiam reperire sciunt. In Musaeo porro hoc, pendet annulus fixi Merurii, Vulcani ferulae cedens ad omnem artificis nutum et normam se flecti ac duci sinit, non solum praestantia artis, verùm etiam medicâ, qua pollet, virtute, pretiosus, utpote, qui praesentaneum remedium, sive antidotum contra venena adhibeatur, eaque detegat.
Potreus Metallorum. Pendet vesica vitrea cava è fontibus vitriolatis Hungariae transmissa, quae adeo corrosiva qualitate pollet, ut exiguo temporis spacio ferri terrea excrementa corradendo ferrum in rubrum cuprum tingat, de quo supra quoque dictum fuit.
Aqua sapientiae. Fecit Author crystrallinum globum hermeticè sigillatum, in quo liquores juxta elementorum ordinem quadruplici colorum varietate distinguuntur, permixtione vero confusi, tam pertinacis naturae sunt, ut immediatè quilibet se in suam sphaeram recipiat, verum quatuor elementorum Symbolum.
Arbor metallorum. Ludit mirificè Ars in rerum Natura, conterit, et ad minima reducit quaevis metalla, quae mira fermentatione foeta, ac vitero vasi inclusa paulatim fermentationis incrementum percipiunt, atque in gratam arborem se hinc inde in vitreo vase dilatantem, et excrescentem degenerat. Talem arborem argenteam hic maxima cum admiratione vident et contemplantur.
Chamaeleon aqueus. Ludit jucunda differentium aquarum praecipitatione Author Musaei; dum in differentes colores, liquores transmutat, eosdem alia mox alterius aquae praecipitatione semper ad pristinum statum reducit, modo tali, ut duobus claris liquoribus mixtis, aureus evadat aquae color, cui, si alias guttulas alterius indas, in atra mentum nigrescat; cui, si alterius speciei indas aquam, iterum se ad pristinam claritatem reducit. Aliis verò aquis claris primò permixtis in candidum lac se mutant, quarum tertia impositâ ambae nigrescunt. Videtur igitur verè chamaeleontum more quasque impressiones assumere, ac iterum dimittere, solaque simplici commixtione varios exhibere ludentis artis in rerum natura jocos; de quibus vide Mundum Subterraneum.
Fulmen et Tonitru Mechanicum. Uti in Causarum et effectuum naturalium indagine ex professo et continuò desudat Kircherus, ita etiam conatur, mechanica imitatione et demonstratione naturae effectus assequi. Quare, quae in Meteoris, oculis nostris scintillantia fulgura ex vaporibus calidis et humidis generantur, aut auribus nostris per horribiles fragores objiciuntur, qualem igne foeta bombarda strepitum natura praestat, talem efficit exiguo instrumento quod Magnatibus advenis exhibere solet.
Pila est vitrea ad instar pisi quoad magnitudinem, quae ad medietatem certo liquore repleta, carbonibusque accensis imposita, osculo hermeticè clauso, fracturâ talem strepitum et fragorem edit, ut praesentes vehementia sonitus, formidine perculsos quasi stupidos et attonitos reddere videatur, atque adeo fulgur, aut tonitrui vel explosae bombardae sonitum cum ingenti fragore exprimat.