Difference between revisions of "Page:Organum mathematicum libris IX. explicatum (1668).djvu/533"

From GATE
(Not proofread: Created page with "''<center>Modus secundus, Per Tabulam temporariam.</center>'' MOdum inveniendi Epactam novam quolibet anno dato in perpetuum, per Tabulas perpetuas, dedimus supra Cap. 12. hic...")
(No difference)

Revision as of 16:25, 9 January 2020

This page has not been proofread


Modus secundus, Per Tabulam temporariam.

MOdum inveniendi Epactam novam quolibet anno dato in perpetuum, per Tabulas perpetuas, dedimus supra Cap. 12. hic dabimus solum temporariam pro veteri Epacta invenienda; quae tamen extendi etiam potest in infinitum, ut videbimus.
Recolendum autem ex dictis ibidem Capite 11, Epactam nihil aliud esse, quam numerum dierum, quibus annus solaris communis dierum 365, superat annum lunarem communem dierum 354. Superat autem hunc ille diebus undecim. Itaque Epacta primi anni est numerus 11, quia hoc numero annus solaris communis superat, ut dixi annum lunarem communem: anni vero secundi Epacta est numerus 22, quia eo anno rursum annus solaris communis superat annum lunarem communem diebus 11, qui additi ad priores 11, efficiunt 22. Epacta autem tertii anni est numerus 3, quia si rursus 11 addas ad 22, efficitur numerus 33, a quo si rejiciantur dies 30, qui unam lunationem Embolismalem constituunt, relinquuntur 3. Atque ita deinceps ad sequentium annorum Epactas formandas progrediendum est: formantur enim omnes ab immediate praecedentibus per continuum augmentum 11 dierum, abjectis tamen 30, quando rejioi possunt. Solum quando perventum est ad ultimam Epactam Aureo numero 19 respondentem, quae est 29, adduntur 12, ut abjectis 30 ex composito numero 41, habeatur rursus pro primo anno Cycli Decennovennalis Epacta 11, ut in principio prioris Cycli. Quod ideo fit, ut ultima lunatio Embolismica, currente aureo numero 19, sit tantum 29 dierum. Si enim 30 dies contineret, ut aliae sex lunationes Embolismicae, spatio 19 annorum occurrentes, non redirent Novilunia post 19 annos solares ad eosdem dies, sed versus calcem mensium prolaberentur, contingerentque die tardius quam ante 19 annos.
Sunt autem 19 Epactae, quot et Aurei numeri, respondentque in Calendario veteri ipsis Aureis numeris eo modo, quo in sequenti Tabella dispositae sunt.