Page:EBC 1614 07 19 1451.pdf/1

From GATE
Revision as of 18:10, 10 December 2018 by Giuseppe Iommazzo (talk | contribs)
This page has been proofread

Clarissime, et eruditissime Domine,
Accepi carmina, quae ad me mittere tibi placuit. Versus cultissimi sunt, et digni meliore materia. Ego enim nihil eorum in me agnosco, quae de me cecinisti. Quod vero per scripta mea tibi Deus ad gratiam suam, atque, ut spero, ad vitam sempiternam aperuerit viam, ex animo gaudeo, et ipsi Patri luminum gratias humillimas ago. Tibi vero ab eodem bono Domino nostro donum perseverantiae, et patientiae in tribulationibus cupio, neque deero precibus meis, quales quales illae sint, data optima, et dona perfecta a Domino virtutum assidue patere. Vale. Datum Romae 14. Kalend. Augusti MDCXIV.
---page break---
Ill.mo ac R.mo D.no D.no Roberto Bellarmino S. R. E. Cardinali
Ampliss.mo P.rone suo col.mo.
Si mihi si qua foret culti sapientia vatis,
Et veluti quondam modo dignaretur amico
Euterpe aspectu, quo splendida gesta liceret
Aeternare virum magnorum, et pingere chartis:
Non mihi materies scribendi carminis esset
Filius Anchisae, virtute insignis et armis
Nec canerem si quos odio Junonis iniquae
Sustinuit duros terraque marique labores
Non Laertiaden vario stratagemate clarum
Exprimerem: nec quae constanti pectore quondam
Multa decennalis devicit praelia pugnae,
Dum cupit excelsae subvertere moenia Troiae,
Aggrederer certis aliquot conscribere metris
Non etiam Alciden memorarem, aut Thesca, nec quos
Longa Poetarum depingit fabula: sed te
Te solum ante alios praestantem insignibus actis.
Maxime vir, cunctis virtutum dotibus aucte
Quem merito syncera Fides, et simplice recto
Gaudens Relligio multum veneratur, et unum
Suspicit, aeterno donarem laudis honore:
Et quae pollenti sancto pro nomine Christi
---page break---