Page:APUG 1123.pdf/34

cum prima tumidi iura deposcunt freti.
CARD. 2us -Depressit vndas Petrus, et Paulus premet.
PON. -Vndosa solus marmora indurat Deus.
Nec hic gemendi finis: imperii potens
Rector Britanni iura contemnit Petri,
colloque durus excutit Christi iugum.
Non ita Britannus Aquilo vicinum mare,
ut ille, lubricus, Angliae terram quatit.
Beata quondam regio, coelicolum ferax,
nunc misera foedam vnius ob noxam iacet.
CARD. 1.us -Calcat triumphis regna violentis amor,
victrix libido nobiles sternit duces.
PON. -Miseranda clades! Roma sanguineo fleat
quam tristis imbre! Reliqua quid luctu sequar?
Qua Rhenus agros corniger pingues lavit,
albisque volucres incitat velox aquas,
noua serpit hydra capite centeno tumens.
Germana Lutherus hydra, diffundit novam
per arva pestem: pinguia arescunt sata,
viduantur urbes, clangit armorum fragor,
concussa pennas Aquila maerentes trahit.
O, mitte Genitor axe stellifero virum
qui collabantis imperî et mundi statum
sistat caducum! CARD. 2.us -Prouidus mundi regit
Arbiter habenas. Monstra nam quoties parit
foecundus Orcus, Herculem immittit Polus,
qui monstra forti victor extinguat manu.
PON. -Mihi purpurati Praesules fas sit loqui,
pridem quod intus flamine impulsus sacro
praesagit animus. Credo quem posco virum

◅▻