His factis, quoniam propositum thema est tetrastrophon, quatuor constans strophis seu periodis, nempe Veni Creator Spiritus, Mentes tuorum visita, Imple superna gratia, Quae tu creasti pectora; et quaelibet periodus constat octo syllabis; selige ex Tabula Musarithmica octosyllabica , praecedenti §.proposita, quatuor quascunque series Musarithmorum, vel eas aliunde accipito,si potes,et sint sequentes.
In quolibet horum Musarithmorum sunt quatuor series numerorum , quae quatuor Vocibus respondent, nempe Cantui, Alto, Tenori, et Basso. Et ultima quidem series soli Basso convenit; reliquae tres reliquis tribus, eo ordine, quem appositae initiales Vocum litterae indicant; licet pro libitu Compositoris mutari possint, et prima series deputari non Cantui,sed Alto, aut Tenori; secunda non Alto, sed Cantui, aut Tenori etc. quando id necessitas exiget,prout supra §. 2. diximus.
His etiam factis, applica columnam Clavium Toni sexti pentagrammi in palimpsesto aut charta descriptis , ac signatis suis Clavibus,prout factum vides in praecedenti paradigmate.Deinde aggredere ipsam compositionem tali pacto.
Primo. Pone ante te palimpsestum dicta paulo ante ratione praeparatum ac signatum , una cum columna Clavium Toni sexti applicata; et inspice atque considera primum Musarithmum antea positum. Et quoniam prima ejus series, Cantui deputata , continet octo 5, sic, 5 5 5 5 5 5 5 5 ; quaere hunc numerum 5, in columna Toni sexti, et vide cui litterae Clavium respondeat, nempe litterae C. Quaere igitur in pentagrammo Cantus locum litterae C ; quem invenies in supremo spatio infra supremam lineam. Nota in dicto spatio octo puncta,tot scilicet, quoties hic numerus 5, in Musarithmo in serie Cantus replicatur:
