Horae pars sexagesima vocatur Minutum vel Scrupulum primum; et hujus pars sexagesima Minutum vel Scrupulum secundum; et siculterius usque ad minutissimam divisionem in Minuta tertia, quarta, quinta, etc.
Annus Solaris est spatium temporis, quo Sol motu proprio ab Occidente in Orientem ab uno coeli puncto fixo ad idem revertitur. Quod punctum si est Solstitii in alterutro tropico circulo facti, Annus dicitur Tropicus, id est, Vertens: si autem sit alterutrum ex punctis aequinoctialibus in Aequatore, dicitur Annus Aequinoctialis: si denique sit Stella aliqua fixa, ver. gr. prima stella Arietis, dicitur Annus Sidereus. Rectius tamen una et eadem semper nomenclatura Tropicus dicitur Solaris annus, sive a Solstitialibus, sive ab Aequinoctialibus coeli punctis initium Solis cursus sumat, quandoquidem recte ac verissime singula dictorum punctorum ... appellantur, ut bene notat, et probat ex Sexto Empirico, Oppiano, Manlio, et Philone Judaeo, P. Petavius in Rationario Temporum Par.2. li.I. cap.I.
Anni solaris Tropici magnitudo varia variis temporibus deprehensa fuit ab Astronomis. Callipus, Archimedes, Geminus, Sosigenes cum Julio Caesare, et alii Vetustiores tribuunt ipsi Dies 365(...), seu Horas sex. Hipparchus et Ptolomaeus Dies 365, Horas 5, Minuta prima 55, secunda 12. Aplphonsus Rex cum suis, Purbachius, et alii multi, D.365, H.5, M.49.15.58.49.46.26. vel brevitatis causa, D.365, H.5, M.49.16 fere. Tycho Brahe, D.365, H.5, M.48.45. Ricciolus D.365, H.5, M.48.40. Alii aliter sentiunt. Copernicus Veterum omnium observationes considerans, et cum suis conferens, ait, omnes priores Mathematicos vera dicere de anni Tropici varietate, eumque revera esse inaequalem, modo majorem, modo minorem, modo mediocrem. Ricciolus tamen cum aliis gravissimis Auctoribus suspectam habet hanc inaequalitatem, propter causas, quas enumerat Lib. 3. Almagesti novi
