Romam.
En tibi munuscula repono, patrio mari expiscata, muneribus lacessitus, vasto isto
tuimet ingenij Oceano depromptis. Subterraneo en offert Mundo tuo miracula
quoque sua Neptunus Drepanitanus. Haec coralia, quàm variè sub aquis gemmifera
Natura Ludat, te philosophantem docebunt. Leguntur Drepano Corum
versùs ad viginti millia passuum, in freto octuaginta non minùs alto, decem millibus
propè insulam Sacram; quam vulgus Maretimò, eandemque, ut suspicor, Plinius
secundo capite libri trigesimi secundi Heliam appellat. Rubrorum hîc inexhausta
copia, et in annum centipondiûm plusquàm centum, totidem ferè cymbis piscatio.
Alba autèm perquàm rara, et aliquotiès rubris in eodem ramo visimus adnata.
Senescunt in natali fundo, et carie afficiuntur suâ: in solo, sibi alieno, eductam
integritatem semper adservant. Fabulosum est ab experientiâ nostrâ, ipsa
Lapidescere ubi emergunt; cum tàm dura sub imo, unde vi retibus avelluntur, quàm
aëri exposita. Verum attamen, è liquidis guttis temerè in ramos quaqueversùm,
sursùm, à latere, deorsùm adolescere, super quodlibet, scopulum, saxum, ostreum,
testam, spongiam, aliudve fortuitum decidant illae. Quod cochleae, et conchae, inter
alia tibi dono missa, liquido probant, undique suffuso coralio aequè ac ductili cerâ,
circumlitae, et tunicatae. Sed quonam guttae effluant, nemo hactenus vidit. Hoc solummodò
piscatores nostri se animadvertisse renunciant, cùm coralijs recens extractis tenella
ramusculorum cacumina fregerint, purpureum quasi lac emanare. Fortassè
in profundo lacte ipso, velut semine, propagant sese; piscibus, caeterisque obviis
fracturae administris. Ita verò se habeat res: causa tamen non penitùs eruta.
Inquirendum adhuc, quid prima, ante fracta, vegetavit? Sanè Kircherius
omnes; vel hanc, maioribus ignotam exquiret; et vivis, posterisque scribet.
Interìm studium in te meum hisce reculis ne metiaris; sed magnum
à parvis aestimans, utraque boni consulas. Vale in acuum literarum
bono, cunctis earum cultoribus colende Vir: et Gasparem Schotum, cuius
tibi amicitiam; Joannemque Baptistam Facchinaeum, cui debeo
---page break---
