Page:Organum mathematicum libris IX. explicatum (1668).djvu/841

PARS SECUNDA.

Instructio uberior pro Astrologia.
In Cursu Mathematico Lib. 10. Satis multa, sed brevissime scripsimus, ex Astrologorum mente, de Astrologiae natura, partibus, & principiis, praesertim Iudiciariae, qua plerique, qui astrologorum nomine gloriantur, pessime abutuntur, cum DEI & hominum offensa. Multa quoque addidimus de Signorum Zodiaci varia divisione, qualitate, & dominio in certa orbis loca, ex eorundem sententia, qui ea dividunt. Primo, in quatuor quaterniones, correspondentes quatuor anni tempestatibus, quatuor hominis aetatibus, quatuor humani temperamenti humoribus, quatuor Mundi plagis, & nescio quibus. Secundo, in signa mobilia, fixa, & communia. Tertio; in masculina, & faeminina. Quarto, in Septentrionalia, & Meridionalia. Quinto, in recta, & tortuosa. Sexto, in antiscia, & se intuentia. Septimo, in signa odiose & benigne se intuentia. Octavo, in imperantia, & obedentia.

◅▻