PRaxin componendi ope Musarithmicum Tabularum explicabo hic, in gratiam Tyronum, iisdem pene verbis, quibus eam explicavi in 2. Par.Magiae Lib.7.pag.413. Itaque quicunque ex Tabulis Musarithmicis cantilenarum aliquam quatuor Vocibus componere desiderat Contrapuncto simplici, haec observet.
Primo. Praeparet pentagramma musica in charta; et, si velit,praeter ea habeat palimpsestum separatum, in quo componat, et composita deinde transcribat in prntagramma praeparata.
Secundo. Eligat thema verborum, et consideret, quem affectum verba illa maxime requirant, num affectum gaudii, tristitiae etc.
Tertio. Ex Tabula Tonographica supra posita eligat Tonum, affectui verborum congruentem affectui inquam, quem uniuscujusque Toni vertici adscripsimus.
Quarto. Signet pentagramma quatuor Vocum , characterismo Cantus Duri, aut Mollis , prout Tonus requirit; et uniuscujusque Vocis Claves ponat in principio pentagrammorum, vel saltem in pentagrammis palimpsesti, Prout supra factum est, et iterum in sequenti paradigmte fiet.
Quinto. Ex Tabula aliqua Musarithmica seligat, et, si placet,transcribat etiam, Musarithmos quatuor Vocum, hac ratione. Si thema propositum est metrum, seligat Musarithmos ex Tabula pro metri dati genere composita. Tales Tabulae sunt illae,quas dedimus initio hujus Libri,et illa,, quam praecedenti § proposuimus. Si vero thema propositum sunt verba soluta, seligat pro singulis verbis, aut saltem pro singulis membris verborum, Musarithmos ex prima et secunda Tabula syntagmatis primi apud P. Kircherum in Lib. 8.Musurgiae, idque juxta exigentiam verborum habentium
