Page:EBC 1620 06 11 2250.pdf/1

Perillustris, ac Reverendissime Domine. Accepi litteras Amplitudinis Vestrae Reverendissimae; sed librum conscriptum adversus pseudosynodum Dordracensem nondum accepi, nec scio quando recipiam. Sed quocumque tempore is liber ad me pervenerit: gratissimus erit, et a me diligenter perlegetur. Quod autem scriptus sit absque mordacitate, mihi valde probatur: sic enim conciliabitur libro benevolentia, et facile fieri poterit, ut a multis legatur. Si quid hic ego possum; jubeat Reverendissima D. Vestra per aliquem ex suis, vel per epistolam, et libentissime faciam, quod mihi vostro nomine injungetur. Longiorem vitam non desidero: satis diu vixi, cum jam proxime accesserim ad annum octogesimum, ultra quem non est, nisi labor, et dolor. His valeat Reverendissimus Dominus meus, et pro me Deum orare non cesset. Romae die 11. Junii 1620.