Page:EBC 1614 02 16 1388.pdf/1

Illustrissime, et Reverendissime Domine Observandissime. Precata est mihi Dominatio Vestra Illustrissima felicem Domini Natalem humanissimis, et cordi meo acceptissimis litteres suis. Ego vero quoniam litteras illas accepi, cum jam feriae quadragesimales agerentur, precor Illustrissimo Domino meo felicem Dominicam passionem, et felicissimam resurrectionem. Scio enim Illustrissimum Dominum meum inter hostes fidei versantem, et cum eis assidue colluctantem passionis dominicae esse consortem; quam illi ita felicem precor, ut ad eminentem resurrectionis gloriam aditum patefaciat. Et quoniam gravissima Christianae Reipublicae negotia non permittunt, ut personae vestrae optatissima praesentia fruamur, gratissimum interim mihi erit pignus amoris, quod in hac ipsa epistola ad me misit. Valeat, et vigeat Illustrissimus Dominus meus, et me, ut fecit, diligat, et communi Domino in sanctis precibus suis commendet. Interim reverentes manus Illustrissimae Dominationis Vestrae deosculans, obsequia mea illi ex corde defero. Romae die 16 Februarii 1614.