et pulchra fraudem larva pietatis clepit.
CHO.1us -Quae viae necandi, fare, delebo luem.
MUD. -Hic*[1] facile cautum suggeret fidus modum.
NIG. -Aequate plano Cantabri tectum solo,
lacerate Mimi nomen, obeuntem vias
stipate probris. Sistitur hodie reus:
adeste crebri, tollite insanas simul
ad astra voces. Iudicis terrent minae,
clamore forte subrutus vestro cadet.
OMN. -Nos exequemur iussa, tu ductor praei.
CHO.2us -Quae turba contra prodit ? MUD.-Ignati schola.*[2]
CHO.3us -Telis petamus. NIG. -Dabitur irarum locus.
Subducite gradum. CEL. -Quod placet ludi genus?
Certare celeri vultis in gyrum pila?
FRAN. -Certemus, umbra sole praecipiti favet 73.[3]
VI. -Quae cerno monstra? Rursus invisum caput
eversa pridem viribus nostris levant?
Vertantur iterum.*[4]Monstra Phlegetontis nigri,
devota Furiis decora. CHO.1us -Imbellis phalanx!
Antiqua noli vertere audaci manu
monumenta Romae! CEL. -Falsa calcamus deum
simulacra. CHO.2us -Coluit Roma. CEL. -Nunc Christus vetat
spernitque Roma. FRAN.*[5] -Vertite, o terrae pudor,
o probra Romae! VI. -*[6]Grando saxorum volat,
huc, huc sodales, alia saxorum strues.
CEL. -Placat furorem lenitas. Socii, truces
vitate rixas. VI. -Vim repelli vi licet.
Aliquandiu pugnatur saxis et armis.*[7]
FERR. -Periculosas urbe quis turbas ciet?
Dirime, satelles, agmen, authores cape.
Quem sauciatum cerno? Scipionem meum?
- ↑ *Denotat Nigrium
- ↑ *Ex alia valle prodit alter chorus puerorum S<anc>to. Ign(atio) faventium
- ↑ 73.Aspiciunt statuas iterum inmanium deorum erectas
- ↑ *Accedunt ut iterum deiiciant.
- ↑ *Deiiciunt iterum
- ↑ *Saxis ab adversa parte petentur. Venitur ad manus, frustra conante Celso pugn<antes> dirimere.
- ↑ *Exit Ferrantus cum satellite
