Page:APUG 1123.pdf/48

Aquilamque sequitur, coetus est Christo sacer.
Clauigera pronus iura Romulei patris
fidusque sceptra Regis Austriadum colit.
Ferale virus haeresum contra vomit
multiplice foetus ore nequidquam Draco.
Ruent sequaces asseclae et victas dabunt
demum sacrorum praesidi summo manus.
CAR. -Non certiora panderet Clario loquax
vates recessu: fare quid porro novus
portendit ille Phoebus. QUI. -Arcano magis
hoc involutum tegmine augurium latet.
Id veritatis certior iudex fluens
evoluet aetas. Saeculi clarum sui
Loyola sydus lumine recenti micat,
ut Phoebus alter, livide telis hydrae
frustra petitus tollet invictum caput
Iesuque late nominis sparget decus.
CAR. -Non vera semper doctus Aonia cheli
Apollo cantat. Saeculi clarum sui
Loyola sydus. QUI. -Nocte depulsa brevi
longa micabit luce. TRI. -Tenebrosam prius
Aurora noctem ducet et vesper diem.
An nigra coelum sydera coruscum tenent?
QUI. -Titan amictu luget interdum nigro,
ponet peplum Loyola. CAR. -Iustitiae rogo.
QUI. -Virtutis igne. CAR. -Si sapis sontem fuge.
QUI. -Sequar innocentem. CAR. -Lubrico pendes loco.
Recipitur aegre fama si pereat semel.
PRAE. -Hodierna statuet exitum liti dies,
nunc actuosus avocat causae labor.

◅▻