ERY. -Flammis nitebit, sensit ubi taedas meas
Ibo, ibo. Divum tecta tumulabit cinis.
Haec taeda Romam sepeliet: busta hic sacra
effodiet unguis, scelera sat novi mea.
Sacrilega furta, virginum incestus, stupra,
vasto cruoris flumine undantem Tybrim,
et triste quicquid, horridum, immane, efferum,
antiqua sensit Roma, sentiet nova.
NIG. -O inferis optata vota! Sed saevi vetat
Numen Tonantis. Aliud urgendum est scelus.
Unîus astu Cantabri pridem stetit
ruitura Roma. Dextera unius caput
mundi vacillans fulcit. Unum hunc si premas,
vicisti, Erynnis. ERY.: -Sit licet coelo editus,
mactabo letho victimam. Coelum licet
conscendat, inde detraham. NIG.: -Nomen viro
ferale, nomen flammeum, dirum, igneum:
Ignatius.3. [1] Quid trepida degeneri metu
nutas Erynnis? Siste, quo praeceps ruis?
ERYN.:-Ad ima Tartara, ad fundum ultimum
Stygiae paludis; nomen haud istud fero,
fatale nomen, torquet, urit, obruit.
NIG.:-Inanis vmbra, nominis monstrum times?
Infame monstrum, tertii regni probrum!
Sed ita est. Timere desinit quisquis Deum
umbram extimescit. Sed animos iterum cape,
Erynnis, auctus redeat in fibras tumor,
vilem trucida Cantabrum, furiis lita.4. [2]
ERYN.:-Dehisce tellus, ore diducto specum
hiantis aperi Ditis; invitas libet
