Page:Romani Collegii Societatis Jesu Musaeum Celeberrimum 1678.pdf/70

From GATE
This page has been validated


ita quoque ipsi gratiis peractis, restituit; sufficere sibi, promissi experimenti veritatem suae celsitudini demonstrasse.
Mediterraneum mare sui sinus sobolem porrigit, ut nobilis hujus Musaei supellectilem augeat; unde hic plura Corallia marina, cum rupe corallifera, anno 1653. à rari ingenii et rerum scientia foelici, D. Joanne Jacobo Scaphilo Trepani Secretario, dono transmissa; unde videre possumus, quanta cum providentia Natura fundum marinum corallinis arboretis vestiat, et varia conchylia, ostraceas exuvias, saxa in monticulos congerat, unde rubra arbor excrescens duritie suâ, et rubore, humano generi pulchrum luxum praebet. Horum monticulorum aliqui intra rara Musaei videntur: fragmenta porrò plurima reperies ex ipsis conchyliis enata; est enim proprium hujus plantae, liquorem spermaticum ex se dimittere, cujus guttae in quodcunque obvium corpus ceciderint, ibidem novae corallinae plantae sobolem nasci faciant. Didicit hoc Naturae arcanum Author ex Arabicis Maris rubri urinatoribus, qui ibidem ad multos annos corallo ex imo maris extrahendo, operam suam impenderant.

CAPUT IX.

Hermetica Experimenta.

Phoenix rediviva; Chymicae artis magisterium; est in hermeticè occluso vitreo vase, aqua ab omini seminali permixtione depurata, contenta ex cineribus plantae, quae Adiantum dicitur, cujus cineres in Salem chymico magisterio reducti, ea virtute et proprietate pollent, ut eandem plantam reproducant perpetuae generationis et corruptionis vicissitudine perennem. Haec est herba verè perpetuo renidens, vivendo moritur, et moriendo vivit, cui bene alludunt hi versus:
Quae thuris lachrymis, et succo vivit amoeni
Fert cunas Phoenix busta paterna suas:
Unica semper avis, pater et sibi filius ipsa
Morte sibi vitam det sibi sola novam.
Nam quoties super orbe decem jam saecula vixit
Supremi moriens nascitur igne rogi.
Sic flos hic vitam sibi reddit morte peremptus,
In vitreis rursum germinat udus aquis.
Res multis tentata, pauci tamen hoc summum Naturae arcanum assecuti sunt; exhibet et hisce alia conjuncta in peculiaribus phialis Naturae miracula, queis integram abietum sylvam, tanquam peritissimi artificis penicillo adumbratam, aut scalpro excisam in vitro parvi laboris impendio distincte spectabilem reddit Author, et adeo quidem ut colore viridi substavescente, pineis racemis, foliis comatis et cyparisatis, imò radicibus ex terra erumpentibus, et intervallo truncorum in terrae superficie mille arbustulis in diverso gramine interjectis, ipsae abietum formae sub aspectum oculi veniant, nec evanescant, sed perpetuò eaedem maneant, nisi fortè fracto vase, uti et Phoenici Kircherianae contigit, qui postquam Regiae Suecorum Heroinae ad primum in Romanam urbem, et Musaei visitationem, ingressum oculos et sensum rapuerat, quasi aliorum asper natura aspectum, inopinato frigoris gelu, vase diffracto Phoenix vegetabilis evanuit, neque postea oculari multorum testimonio