Page:Romani Collegii Societatis Jesu Musaeum Celeberrimum 1678.pdf/44

nescius, eccè ferocissima Tigris, et ipsa ad eum devorandum avida, quid ageret miser inter Crocodilum et Tigridem medius, quid in tam ancipiti arena caperet consilii nescius, certissimum utrimque fatum infelicem exitum spondebant, à flumine hitante rictu Crocodilus, à terra Tigris famelica exitium praesentissimum minitabantur, cum itaque nullus effugii locus, ad Coelitum invocationem conversus, opem implorat, vota emittit, nec incassum: exaudivit coelum suspiria; siquidem Tigris concitato impetu quasi jamjam in frusta decerptura hominem insilit, ille dum inclinato corpore impetum effugit , ecce (mirum dictu) Tigris recta in fauces illabitur Crocodili, qui tam fortiter illam tenuit, donec eam exanimaret. Lusitanus verò tanquam tertius inter duos gaudens, gemina fata feliciter evasit. Ita Itinerarium R.P.F. Joannis a Jesu Maria Carmelitani.
Recensuit Princeps Anhaltinus RP. Athanasio superioribus annis, ex relatione cujusdam, qui Tragico casui interfuisse eidem Principi asseruit, succedentem casum prorsus fatalem, et exoticum: In Archipelagi insulis Philippinis sub 7. grad. latitudinis ultra Aequatorem est insula Java, in qua Regulus insulae in urbe, dicta Batavia residet; Gubernatio Insulae à quodam Hollando pendebat, cujus gubernatoris merita Regulum eò devicerant, ut sibi filiam ejus desponsandam statueret; dumque jam condictus esset Hymenaeo dies, laetissima futurae solemnitatis exordia praeparantur, festivitati adaptantur omnia; sponsa verò animi relaxandi gratiâ comitantibus Virginibus proximum extra urbis pomeria, arundinetum, solitaria deflexerat; dum autem solito longiùs moraretur, ejus comites Virgines moram pertaesae, ad eam inquirendam emittunt; abeunt, sponsam quaerunt, inclamant, investigant, sed nuspiam apparet; in quaerendo totus perditur dies, nec ubi locorum, aut quid de ea actum, aut quis eam abstulerit error, nemo erat, qui indicaret, aut referret. Subintrant arundinetum, cum igitur jam communis suspicio increvisset, sponsam factam esse alicujus bestiae praedam, cum quoque recentissima Crocodili vestigia apparerent, aucta suspicio, et vix tantillum intra arundinera ferae vestigia prosecuti, ecce patente faucium hiatu bestia in obvios incurrit; summum vitae discrimen adierant, nisi praecipitato insequentem cursu antevertissent. Ad Regulum ac Gubernatorem itaque reversi, rem ordine, et quod inierant discrimen, metu penè exanimes exponunt. Cogitur proinde consilium, petuntur vota, quid in negotio faciendum, omnesque in unum consulunt, tam exitiale malum, aut vi, aut dolo circumveniendum esse. Aptatur itaque extemporalis fabrica, fallaci pavimento instructa fovea, quam ubi bestia quaedam subolens praedam introgressa fuerit, unà cum pavimento