Page:Romani Collegii Societatis Jesu Musaeum Celeberrimum 1678.pdf/40

centrum 24 horarum Spatia sympathicè Angelo, qui in media aqua fixus manet, indiceque occurrentia sibi horarum intervalla distinguit. Secundus globus vitreus, cujus exteriorem superficiem diversis coloribus interdistincti circuli, seu lineae, Solis ac Lunae reliquorumque Planetarum vagabundorum circumvolutionem diurnam, et nocturnam discriminantes referunt. Genius in medio pendulus ad suae motricis virtutis praedominans imperium, impiger circumit, sceptroque, quod manibus gestat, invetreae Sphaerę circumferentia, influxum praedominantis Planetae indicat.
Tertia Sphaera Zodiacum, et reliquam orbis siderei lucentem, et fixam familiam refert, in cujus medio alter itidem Genius, magnete, ut prior, foetus, iisdem legibus 24 Meridianorum intervallis totidem horarum spacia ad quodvis momentum, nostrum Horizontem, influentia fixa sidera ostendit. Fulciunt harum machinarum magnetico-vitrearum latera, columnae parallelipedae duae ex utroque scilicet latere, quarum una ad horarum Italicarum, altera ad Astronomicarum cursum indies designandum inservit, adeò vago artificio, ut in omnibus ad celeberrimum hoc Musaeum advenis singularem admirationem excitet. Sunt porrò adeò adornatae, ut inter se contrario motu horas indicent, cùm earum una Solis simulacrum in levissima chartula magnete foetâ ascendendo horas indicat; pari passu in altera columna, Luna itidem levissima in chartula effigiata, descendendo aequis intervallis idem prorsus praestat. Moventur hae duae chartulae Solis ac Lunae simulacra exprimentes, motu naturali, progrediunturque, mox sursum, mox deorsum, nec tamen ulli rei annexae, aut agglutinatae haerent, nec rotis devehuntur, neque alio extrinseco adminiculo fulciuntur, ita ut eas liberè abstrahere liceat, et in suum locum reponere. Ex parte autem superiori ab unius columnae Coronide ad alteram naturalis aviculae exuvium, et artificio intrinsecus ita animatum, ut quatiendo alas, caput et caudam ad vivum movere, atque ab una columna ad alteram volare, et in utroque termino volates requiescere videatur; haec etiam transitu suo in pulchrè adornata trabe, quae aviculae pedes suffert, divisa horarum spatia indicat. Circundat tam elegans florum, ac frugum corymbus hanc epigraphen.
Mens agitat molem, et magno se corpore miscet.
In arae demùm lateribus utrimque duae Sphaerae cum suis in medio indicibus instructae cernuntur; ab horum indicum motum totius arae partes sympathico motu concitantur, singulaeque adaequatis intervallis tum motu naturali deorsum, tum violento sursum, tum etiam in linea recta horizantali, demum verò in peripheria è centro secundum peripheriae ambitum uno eodemque actu moventur. Vide Figuram in 2 edit Artis Magnae Lucis et Umbrae.