monumento reperta fuit, quae et immediate extincta fuit. Olybius in agro Patavino Plutoni sacravit Lucernas, quae ultra A. 1500 accensae asseruntur, teste Fortunio Liceto lib. 1. cap. 9. ubi sic scribit: Annum circiter 1500 nostrae salutis juxta Atestem Municipium Patavinum, dum foderetur à rusticis terra solito altiùs, reperta est Urna fictilis, et in ea altera Urnula, in qua adhuc erat Lucerna ardens inter duas ampullulas, quarum altera erat aurea, altera verò argentea, purissimo quodam liquore plenae, cujus virtute Lucerna illa per tot annos arsisse creditur, et nisi detecta fuisset, perpetuo arsura.
In Urna majori hi versus legebantur: Plutoni sacrum munus ne attingite fures.
Ignotum est vobis hoc, quod in arte latet.
Namque elementa gravi clausit digesta labore
Vase sub hoc modico maximus Olybius.
Adsit foecundo custos sibi copia cornu,
Ne tanti pretium depereat Laticis.
In Urna minori subsequentia legebantur Carmina:"
Abite hinc pessimi fures
Vos quid vultis vestris cum oculis Emissititiis?
Abite hinc vestro cum Mercurio
Petasato, Caduceatoque.
Donum hoc maximum Maximus Olybius
Plutoni sacrum facit.
Modum, quo attingere tentant moderni, insinuare placet, unde etiam impossibilitas elucescit, itaque inquirendum, quo fomite hic aeviternus ignis nutriatur. Vel enim hoc contingit ex natura eius inconsumptibilitatis, vel ex modo, ut plerique volunt, accensonis: nihil horum fieri posse experientia propria ita ostendo. Vitreum globum hermeticè ita obscuravi, ut aëri impervius sit, ubi fomitem, luminisque alimenta varia imposui, demumque Lentis Opticae ope, Solis radium in unum punctum ad ignis escam coëgi; sed ex aëre vi caloris rarefacto, vasis confractionem loco experientiae habui. Materias varias applicui; naphtham tentavi, ex sulphure et nitro diversimodè a terrestreitate repurgato, igni alimentum aeternum parare, incassum probavi. Olea metallica, et aliorum mineralium pinguem materiam inflammavi, non comperi, et postquam Asbestinum ellychnium tanquam inconsumptibile expertus fui, ex eodem Asbesto, seu Amianto, et ex alumine plumoso, et Talco oleitas extracta nonnullum effectum mihi pollicebatur, sed irrito conatu, cum istiusmodi olea ita intra Amiantum concentrata repererim, ut nullo artis et ingenii nisu in oleaceum liquorem separari potuerit. Rem itaque peritioris aleae Philosophis consignandam censui. Nos nostra prosequamur.
De instrumentis Mathematicis.
Vaga, locuples, et pretiosa Mathematicorum instrumentorum multitudo hic visitur, quorum maxima pars est ex aurichalco, lapide schisto, et ligno confecta. Illa ad Coelestium corporum, et ad Sphaerarum observationes, et geometricas dimensiones, geographicas divisiones, horarum designationes inserviunt; sunt autem duo globi praegrandes ob molis quantitatem è Musaeo ablati, et ad Collegii Romani Bibliothecae usum ab Authore donati; alii duo globi minores, unus Coelestis, alter Terrestris; uterque suis Meridianis diligenter elaborati. Sphaera Armillaris ex aurichalco
