Page:Prodromus coptus sive aegyptiacus (1636).djvu/141

From GATE
This page has been proofread


Pavonis figura Cruci imminens insigne est Regis Narsingae. Caetera quae circa hanc crucem certis temporibus contingere solere diximus omninò mirabilia, lege apud dictum Lucenam, & Osorium quem citat Baronius tom. 1. anno Christi 57. Extra scopum forsan haec videri possent. Sed cùm in ea nescio quo casu inciderim, ea praeterire hoc loco nolui, cùm ut eximiae antiquitatis monumentum Europae haud ita forsan notum, tùm ut, quomodo Breviarium & Martyrologium circa locum passionis S. Thomae intelligendum esset, hoc digressu Lectori forsan haud ingrato, patefacerem. quare ad derelictam semitam revertamur. Haec itaque Indiae transmontanae Regio à S. Thoma Apostolo ad Christum conversa, cùm