Page:Prodromus coptus sive aegyptiacus (1636).djvu/134

Africa in Asiam, aut ex hac in illam transmigratione fiat mentio: imo expresse negat Damianus a Goes l. de Aethiopum moribus, eum Presbyterum Ioannem dici, aut unquam dictum esse, quod et Sacerdotes Aethiopes supra citati afferunt. Sed intelligimus maximum illum Asiae Principem, de quo in praecedentibus hactenus dictum est. Illo enim eiusque successoribus longe lateque in Asia Imperantibus, fidemque Christianam egregie promoventibus, aut vocatos, aut sponte sua fama istorum Regnorum et promovendae fidei zelo, aut quod probabilius est dirae illius persecutionis, qua in Syria, Aegypto, vicinisque Aethiopiae locis, ad supplicia saevissima Christianae vitae sectatores, passim inquirebantur, compulsos formidine e dictis locis fugientes in media Persia Bactria Turchestane substitisse, deinde in extremas Asiae regiones, paulatim longo exilio pervenisse, omnino verisimile est. Imo id luculenter demonstrat superius adducta Syriaca inscriptio, ubi Iizbuzad Archiepiscopus Sinensis dicitur filius Noe Sacerdotis cuiusdam oriundi ex civitate Belech Regni Turchestan; quemadmodum e Syriacis verbis hoc loco repetitis constat;