Page:Prodromus coptus sive aegyptiacus (1636).djvu/116

From GATE
There was a problem when proofreading this page



CAP:IV


De Expeditione Aegyptiorum, seù Coptitarum, in India, China, et reliquas Asiae regiones facta
Cum in India, China, caeterisquae Asiae regionibus, frequentia in hunc diem adhuc extent Christianae Religionis vestigia, operae pretium faciam, si declarato iam Syro-Coptitarum in China reperto monumento, hoc loco quoquè monstrem, qua occasione, et via hi Apostolici Viri in huiusmodi remotissimas plagas penetrarint; hoc enim praestito, Aegyptum non Christianae tantum Religionis, in exteris regionibus promovendae; sed, et omnis superstitionis per totum orbem propagatae Seminarium nullo non tempore fuisse, clarè patebit. Verùm ut in re abstrusa clariùs procedam, primò sententias quorundam hic de iis proponere visum est; ut illis discussis quid circa rem propositam statuendum sit, luculentiùs patefiat. Primò itaquè non desunt, qui huiusmodi Colonias Christianorum in Chinam caeterasquè Asiae regiones penetrasse afferant ope magni illius Imperatoris Asiatici, quem Authores passim Presbyterum Ioannem vocant; Sed cum maxima sit inter Authores de hoc Imperatore, eiusquè Regnorum situ, qualitate, ac conditione,