Page:Organum mathematicum libris IX. explicatum (1668).djvu/427

From GATE
Revision as of 10:34, 14 February 2020 by ArchivesPUG (talk | contribs) (→‎top: clean up)
This page has not been proofread


§. II.

De Horis aequalibus, et inaequalibus,

horarumque Minutis.

Dies tam Naturales, quam Artificiales, dividuntur ab Astronomis in Horas, et Horae in Minuta seu Scrupula. Horae aliae sunt aequales, aliae inaequales.
Horae aequales sunt pars vigesima quarta diei naturalis, et Graecis vocantur ..., Latinis aequidiales, seu aequinoctiales. Harum quatuor sunt species, seu denominationes, propter quatuor diei naturalis diversa initia apud diversas gentes, ut dicemus Capite 5. sequenti: nam aliae vocantur horae Babylonicae, seu ab Ortu Solis, aliae Italicae, seu ab Occasu Solis, aliae Astronomicae, seu a Meridie in Meridiem, aut a Media nocte in Mediam noctem; aliae Europae, seu a Meridie in Mediam noctem, et a Media nocte in Meridiem.
Horae inaequales sunt pars duodecima diei aut noctis artificialis. Hae vocantur Graecis ..., Latinis temporales, hoc est, cum tempore mutabiles, quia nunc longiores, nunc breviores sunt, quoniam tam dies quam noctes nunc sunt longiores, nunc breviores, extra sphaeram rectam. Vocantur etiam Judaicae, et Antiquae, quia iis usi suerunt olim Judaei, et omnes fere Antiqui, qui quemlibet diem artificialem, et quamlibet artificialem noctem, seu breves illae forent, seu longae, dividebant in duodecim partes aequales, incipiendo ab ortu et ab occasu.
Singulis his horis inaequalibus, tam diurnis, quam nocturnis, ajunt Astrologi dominari singulos septem Planetarum: unde ab illo quemlibet hebdomadae diem denominarunt, quem prima illius diei hora dominari autumant, attribuendo primae horae diei, quem Solis diem vocamus, dominium Solis, indeque descendendo per Planetas Sole inferiores, et iis absolutis ascendendo ad Saturnum, et ab eo per Jovem ac Martem redeundo ad Solem. Sed haec cum vana sint, et Astrologastrorum deliramenta, nolo diutius iis inhaerere. Videat, qui volet, plura de his, quae diximus in Cursu Mathem. lo. cit. §2.