Page:Obelisci Aegyptiaci Interpretatio hieroglyphica 1666.pdf/81

fiebat; Erant autem triplicis generis, vel enim fiebant ex pyrite, quem granito rosso vocant Itali, vel ex fulgida et splendida solaris naturae argilla in fornace cocta; vel etiam ex ligno Perscae, solaris naturae arbore, uti et tripes, in quo sacra variis ceremoniis peragebant; omnia verò tot et tantis ritibus instituebantur, ut nihil in iis non mysticum spectaretur; vides tripodem in superiori parte Loti florem referre, deindè in sacrae catenae formam, quam.. vocabant, elaboratam, queis significabant, quod quemadmodum Loti flos phebaeo calore attractus ad Solem perpetua se vertigine convertit, ita fieri quoque credebant, ut Solare Numen Osiris hoc symbolico apparatu attractus Hieromantarum se votis cum plena satisfactione sisteret; et hoc argutè sanè per tripodem tribus circulis, veluti annulis quibusdam concinnatam efformabant, quo Osiridis supremi in triplicem Mundum diffusi attractum exprimebant. Vide quae de hisce in Obelisco Pamphilio fol.446. et in Oedipi Tomo III. et in omnibus ferè Obeliscis semper obviis, quàm fusissimè egimus; neque etiam satis fore, ea Obeliscis insculpsisse rebantur, sed insuper ea in variis materiis Soli congruis effigiata, veluti summae efficaciae contra adversarum rerum occursum amuleta gestabant.
II. Sequitur modò Papilio..., litera h signatus una cum iunco Nilotico, vel si mavis caule papyraceo. Quae quid notent, indicemus. Primò itaque toti Mundo dominari volunt potentiam quandam, quam, ut suprà ex Iamblicho ostensum fuit, pantamorpham vocabant, id est, omniformem, quam nonnulli Hylei, sive materialis Mundi praesidem, Colcodean Arabes dicebant, eò quod formas singulis rebus congruas consentaneasque destinet; ex quaram formarum apta distributione, summa illa rerum varietas, in rerum omnium humano generi necessarium usum emergat; atque hoc Numen aptè sanè per papilionem.... indigitarunt. Est hoc animal Aegypto proprium, et inter papyreta passim reperitur, bicorne, caudam haqet serpentis in morem effigiatam, alis amplis et patulis praeditum, nunc binis, modò quaternis pedibus, uti hìc instructum. Huiusmodi animal Aegyptii notabant, ex vili verme primò in bipedem; deindè in quadrupedem excrescere, mox alis innumera figurarum varietate imbutis, cornibus quoque conspiciendum se praebere: ut proindè mirum non sit, eos, dum prodigiosam hanc metamorphosin viderent, id ceu congruum sanè praesidis materialis Mundi symbolum assumpsisse; hìc enim ex materia formarum appetitiva, dispositionibus praeviis introductis veluti ex chao quodam elementaris miscellae per omnes Naturae gradus, genesin suum extendit; unde primò bipedum genus per binos, mox quadrupedum per quaternos, pedes, deindè volucrum varietatem

◅▻